Logistikkfólk til Søludeildina

Ert tú ágrýtin og skipað/ur, og hevur tú áhuga fyri logistikki? So ert tú tann sum vit leita eftir til eitt starv á Søludeildini hjá Bakkafrost.

Starvið

Søludeildin stendur fyri allari sølu í samtakinum, og uppgávurnar fevna breitt. Vit eru errin av okkara vøru, sum fevnir um frystan, feskan og royktan laks. Á deildini eru uppgávur í samband við logistikk, sølu, fakturering, ordrastýring og mangt annað. Á Søludeildini starvast fólk við staðseting í Føroyum, Skotlandi, USA og Frankaríki.

Uppgávurnar sum logistikkfólk eru fjølbroyttar og fevna um alt frá móttøku av ordrum, til útflutning av vøru og uppfylging av leveringum. Tú fert serliga at arbeiða við:

• Samskipa flutning bæði sjóvegis og loftvegis til kundar kring allan heimin

• Tætt samskifti við kundar, agentar og farmafeløg

• Planlegging og uppfylging

• Avgreiðslu av váttanum og skjølum í samband við útflutning

• Farmaskjøl, bókingar og planlegging í samband við FarCargo

• Fakturering

Harumframt kemur ymiskt annað fyrifallandi arbeiði á Søludeildini. Tú kemur at hava samband við nógv ymisk fólk innanhýsis og uttanhýsis, og til tíðir kann ferðin vera høg. Tú fært ríkiligan møguleika at læra og fáa avbjóðandi arbeiðsuppgávur.

Starvsstaður er á Glyvrum. Talan er um fulltíðarstarv á 40 tímar. Arbeiðstíðin fer at variera ímillum dag og kvøld, alt eftir hvat krevst til flutningsskjøl.

Vangamynd

Tað er ikki krav til útbúgving, men tað er greiður fyrimunur, um tú hevur royndir innan umsiting og flutning. Tú dugir væl at samskifta í skrift og talu á føroyskum, skandinaviskum og enskum.

Vit ímynda okkum, at tú arbeiðir skipað, hevur góð samskiftisevnir og klárar at loysa óvæntaðar avbjóðingar, sum kunnu stinga seg upp. Tú skalt trívast í einum gerandisdegi við høgari ferð. Til tíðir er arbeiðstrýstið stórt, og dagarnir kunnu vera langir, men so taka vit okkum at løttum aðrar tíðir. Vit trívast væl á deildini og eru góðir starvsfelagar hjá hvørjum øðrum.

Løn og setanartreytir

Løn og setanartreytir eru eftir avtalu.

Meira at vita

Vilt tú hava meira at vita um starvið, ert tú vælkomin til at seta teg í samband við Símun P. Jacobsen, sølustjóra, á tel 23 50 04, ella við telduposti til sipj@bakkafrost.com.

Umsókn

Søk starvið við at trýsta á knøttin niðanfyri. Umsóknarfreistin er 14. desember 2025. Starvsbyrjan er eftir avtalu.

Allar umsóknir verða viðgjørdar í trúnaði.

 

Um Bakkafrost

Bakkafrost samtakið er størsta alifyritøka í Føroyum og næststørsta alifyritøka í Skotlandi. Samtakið hevur fulla virðisketu frá fóðri, smolt- og laksaaling, kryvjing, liðugvøruframleiðslu til sølu. Framleiðslan av mjøli, lýsi og fóðri er á Havsbrún í Fuglafirði. Kryvjivirkini eru á Glyvrum og í Vági, meðan liðugvøruframleiðslan (góðskingarvirkið) er á Glyvrum, og alivirksemi er í Norðoyggjum, Eysturoynni, Streymoynni, Suðuroynni og í Skotlandi. Felagið hevur lívfiskavirksemi í Streymoy, Sandoy og í Skotlandi og harumframt eitt biogassvirki á Streymoynni. Høvuðsskrivstova felagsins er á Glyvrum og søla- og umsiting er eisini í Edinburgh, Munkebo, Boulogne-sur-Mer og í New Jersey. Samanlagt hevur samtakið 1.600 starvsfólk (ársverk)